Kol Baayar (קול ביער, הבן, שומר, יחדשהו) Lyrics

קול ביער

קול ביער אנכי שומע, אב לבנים קורא

א געשריי, א געוואלד, און א געפילדער

א פאטער אין וואלד זוכט זיינע קינדער

בני בני הכן ישבתם אשר עלי כך שכחתם

קינדער קינדער, וואו זענט איר געזעצן

וואס איר האט מיר אזוי פארגעסן

עס איז מקובל אז דער הייליגע ניגון קומט נאך פונעם הייליגען צדיק ״דער שפאלער זיידע" זצ״ל - א ניגון פון געגועים און השתפכות הנפש אויף גלות השכינה און אויף כלל ישראל. לויט די מסורה, פלעגט דער הייליגער שפאלער זיידע דאס זינגען פאר קריאת שמע שעל המיטה און פאר תיקון חצות, און מיר האבן נישט קיין השגה אין די טיפקייט פון די ניגון.

הבן יקיר

הבן יקיר לי אפרים אם ילד שעשועים כי מדי דברי בו זכור אזכרנו עוד על כן המו מעי לו רחם ארחמנו נאם השם.

(ירמי' לא:כ)

נתחבר ע"י הרב החסיד ר' קלמן שטעקל ע״ה.

ר׳ קלמן איז געווען א הייסער וויזניצער חסיד, אן ערליכער איד פון אמאל, וואס א ניגון האט געהאט ביי אים אן אמת'ע משמעות. ר׳ קלמן האט פארפאסט אסאך הערליכע ניגונים וואו ער האט ארויס געברענגט פון טיפעניש פון הארץ ערליכע געפילן אין געגועים לאבינו שבשמים.

שומר ישראל

שומר גוי אחד שמר שארית עם אחד ואל יאבד גוי אחד המיחדים שמך השם אלקינו השם אחד.

(תחנון)

נתחבר ע״י המנגן המפורסם מלך החזנים, ר׳ יוסע׳לע ראזענבלאט ע״ה

דער תנועה איז איין שטיקל פון זיין קאמפעזיציע אויף ״שומר ישראל״.

ס׳איז באוויסט אז אויסער דעם וואס ר׳ יוסע׳לע איז געווען דער יחיד במינו אין כח הנגינה וחכמת החזנות, איז ער געווען גאר אן ערליכער איד און האט געהיטן אויף תורה ומצוות להפליא, עפעס וואס איז געווען גאר א שווערע זאך פאר אזא טאלאנט יענע יארן אין אמריקה. (עס איז אינטערעסאנט צו באמערקען אז ווען האדמו״ר הקדושת ציון מ׳באבוב איז געווען דער שליח ציבור שבת ביי שחרית, כאטש ער האט מחבר געווען הונדערטער אייגענע ניגונים, האט ער אפט געזינגען ״שומר ישראל״ אויף ״הקל הפותח".)

יחדשהו

נתחבר ע"י החסיד ר' אהרן לעוונטאל ע"ה

ר' אהרן איז געווען א סטאלינער חסיד וואס האט געוואינט איו ארץ ישראל. אין יאר תרס"ח איז ער צוריק געפארן צום שטאט סטאלין אין די ליטא און ער האט פון דארט ארויף געברענגט דעם ניגון. עס איז פארהאן א זעלטענע רעקארד פון דעם ניגון דורך תנא בורשטיין אין יאר תרע"ג אין די שטאט סדילקאוו וואו דער הייליגער דגל מחנה אפרים איז געווען רב.