Muqammal Qisse (LIVE) Lyrics

Wo kavita

Jo sadiyon se gunguna raha hun

Gaur farmaiyega

Chalo aao kuch guftagu karte hain

Jo hui thi mulakat, usko mukammal karte hain

Fir kuch pal tumko sawalon mein uljha kar

Tumhare husn ka deedar karte hain

Chalo aao kuch guftagu karte hain

Shayad dekha nahi tumne meri aankhon mein

Shayad suna nahi meri dhadkano ko

Ye Jo seene mein ek aag uthi hai

Tere hone se usko khatm karte hain

Chalo aao kuch guftagu karte hain

Na tumne aur maine bhi

Kabhi aisa socha toh nahi tha

Par ab jo ho gaya hai pyaar

Tumse iqraar-e-mohabbat karte hain

Chalo aao kuch guftagu karte hain

Tumko dekhe se aa jaati hai munh par raunak

Tumko sunne par ho jaata hai dil gulzar

Tumko dekhe se aa jaati hai munh par raunak

Tumko sunne par ho jaata hai dil gulzar

Kuch der tumhari zulfon mein panah lete hain

Chalo aao kuch guftagu karte hain

Jahan hui thi mulakat, fir se wahin milte hain

Aur kuch pal tumko sawalon mein uljha kar

Tumhare husn ka deedar karte hain

Chalo aao kuch guftagu karte hain

Ladki ko coffe bahut pasand thi aur ladke ko

Chai

Toh ik subah

Ladka chai banane gaya toh usne aaj socha ki

Aaj chai ki jagah coffee pi jaayegi

Toh

Dikkat ye thi ki ghar mein dudh khatm ho gaya tha

Uspar usne ye likha ki

Aaj dudh khatm ho gaya tha

Fir coffee kaali banayi maine

Tumhari yaad aane lagi

Ki tum hoti toh tumhare liye bhi banata

Tumhe pasand hai na kaali coffee?

Har ek ghoont par tum yaad aati rahi

Har ek 'aah par dil thar-tharata raha

Lab aapas mein jude nahi, aur

Khamoshiyon ki dhun par main muskurata raha

Mujhe yaad hai jab tum aayee thi mere ghar

Aur maine kitchen ki taraf ishara kar ke

Tumko banane bola tha kaali coffee

Tum bhi be-qarari sang lag gayee

Hamare ghar ko banane mein

Jiski neenv wo kaali coffe thi

Tumhe pasand hai na kaali coffee?

Kayee baar WhatsApp par chat karte-karte

Chat chal rahi hoti hai aur

Achanak se ladki gayab ho jaati hai

Fir kuch der baad reply karti hai

Aise mein ladke ne usko message kiya

Ye jo beech mein yun chali jaati ho

Ye jo beech mein yun chali jaati ho

Jaana padta hai ya jaana chahti ho?

Tab tak mein ladki wapas online aati hai aur inse usko dubara message kiya

Ab jo aayee ho

Ab jaaogi toh nahi?

Sab sahi chal raha tha par achanak se ek din

Ladki kahin chali gayee

Na koi baat

Na koi khat

Bas achanak se gayab

Ik raat

Ladka chup-chap apni balcony mein baith kar

Kuch soch raha tha

Aaj yun hi na jaane kahan se

Mann mein mere ek khayal aaya

Ki tum jab bhi kahin bahar jaati hogi

Apne shahar mein naye logon se milti hogi

Kisi ko likhte toh kisi ko gunagunate sunti hogi

Toh kya tum mujhe yaad karti hogi?

Kisi ko khud ki tasveer banate dekhti hogi

Kisi ko mohabbat jatate dekhti hogi

Kisi ko gir kar uthte dekhti hogi

Kisi ko apne liye ladte dekhti hogi

Toh kya tum mujhe yaad karti hogi?

Aksar isi khayal mein gum

Tumhari yaad mein jeeta raha hun main

Aaj yunhi na jaane kahan se

Mann mein mere ek khayal aaya

Ki kya tum mujhe yaad karti hogi?

Mahine beette gaye aur

Ladka sanjeeda hota raha

By the way ye mere dost ki kahani hai

Main toh bas suna raha hun

Maine ek kitaab likhi thi pichle saal

Nazm-e-Qaasid ke naam se

Jisme Qaasid mera takhallus hai aur

Qaasid shabd ka arth hota hai messenger, sandeshvahak

Toh maine apne dost ko ye samjhaya

Mohabbat ka ek usool hota hai janaab

Mohabbat ka ek usool hota hai janaab

Ki mohabbat bas ki jaati hai, li nahi jaati

Wo ja rahe hain toh jaane do Qaasid

Wo ja rahe hain toh jaane do Qaasid

Suna hai subah ka bhoola shaam ko ghar laut hi aata hai

Ek roz ki baat hai ladke ne kisi social media par

Ladki ki nayee profile dekhi

Jisme wo mangal sutra aur sindoor mein thi

Kaafi disappointed ho gaye sab

Waqt tham sa gaya tha

Kyunki iska dil toot jo gaya tha

Fir isne do nazmon mein apne jazbaaton ko bayan kiya

Ishq mein ibadat humne bhi beshumar kiya

Ishq mein ibadat humne bhi beshumar kiya

Aur wo laute zarur magar mahboob ke saath

Hazaron ghazalen likhi thi uske naam par

Hazaron ghazalen likhi thi uske naam par

Magar aaj unko gaata koi aur hai

Kabhi-kabhi kuch cheezein waqt ke saath

Itni gehri ho jaati hain ki zakhm bharne layak nahi rahta

Ab ladki ko gayab hue kuch saal ho gaye the

Ladke ne apne saare jazbaat

Apne do khaas doston ko ek khat likh kar bayan kiya

Usme usne kaha

Achha ab suno

Mere nahi rehne par

Mere ghar aate rehna

Jo kuch jaise bhi hai

Usko waise hi bachaye rakhna

Gandagi na ho isliye saaf-safai karate rehna

Shayad hawa aakar khat-khataye mera darwaza kahin

Shayad ye puche ki kuch dino se main dikha nahi

Usko sach mat batana bikhar jaayegi

Chup-chap uski aankhon mein dekhna samajh jaayegi

Fridge hamesha chalu hi rehta hai uska istemaal karte rehna

Mere bistar par jo chaadar bicha hai usko badalte rehna

Mere kapdon ko rakhna meri yaad mein

Zarurat ho kisi ko toh usko pehenne dena

Kamre mein ek paudha rakha hai mej par

Us mein paani daalna, dhoop dikhate rehna

In sab kaamon mein thak jaao toh aaraam kar lena

Bartan pade hain kitchen mein kuch bana lena

Ek aur zaroori baat ka khaas dhyan rakhna

Almari mein kuch kaagzaat rakhe hain unko sambhaal kar rakhna

Makaan ke dastaavez tum papa ko dena

Kuch nazm pade mile toh us tak pahuncha dena

Kehna main khud nahi aa paaya use nazm kahne

"Kuch zaroori kaam tha, jaana pada use maaf kar dena"

Kuch tohfe bhi milenge tumko kisi daraaj mein

Meherbaani karna, us tak pahucha dena

Uski khushi ko dhyan se dekhna

Agar roye toh usko hausla dena

Kehna main theek hun yahan koi dikkat nahi

Aata rahunga milne usse khwabon mein kahin

Ye saari baatein tum ek kaagaz par likh kar

Mere takiye ke neeche rakh dena

Kabhi bhatakta hua agar main aaya

Toh mujhe akela rehne dena

Meri tasveer tangi hogi ek deewar par

Us par haar mat chadhne dena

Meri baatein karna, mere pyaar ke qisse sunana

Sab ki yaadon uske khayalon mein mujhe marne mat dena

Shayad yahan se ab laut na paaun main

Shayad yahan se ab laut na paaun main

Toh mere nahi rehne par mere ghar aate rehna

Toh mere nahi rehne par mere ghar aate rehna

Shukriya