Mauiakamalo Lyrics

O Akalana ke Kane, O Hinaakeahi ka wahine

Hanau Maui mua, hanau Maui waena

Hanau Mauikikii, hanau Mauiakamalo

O ka malo o Akalana i humea

Ho'okauhua Hinaakeahi, hanau he moa

He huamoa ke keiki a Hina i hookauhua

Aohe ho'i he moa o ka moe ana

He moa ka ka hanau ana

Alala ke keiki, ninau Hina

Aohe ho'i he kanaka o ka moe ana he keiki ka

He keiki aiwaiwa na Hinaakeahi

Ukiuki Kiailoa ma laua o Kiaiakapoko

O na kaikunane ia o Hina

O na kiai elua iloko o ke ana ha

Paio haka Maui, hina ua kiai

Kahe ka wai 'ula i ka lae o Maui

O ka ua mua ia a Maui

Kii i ka pu awa hiwa a Kane ma laua o Kanaloa

O ka ua alua ia a Maui

O ka ua akolu ke kuekue o ka ahuawa

O ka ua aha o ka ohe a Kane ma laua o Kanaloa

O ka ua alima o ka paehumu

O ka ua aono o ka anuu

Nunu Maui, ninau i ka makuakane

Hoole Hina, Aole au makua

O ka malo o Kalana o ka makua ia

Ono i ka iʻa na Hinaakeahi

A'o i ka lawaia, kena Hinaakeahi

E kii oe i ko makuakane

Aia ilaila ke aho, ka makau

O Manaiakalani o ka makau ia

O ka lou ana o na moku e hui ka moana kahiko

Kii ana ka alae nui a Hina

Ke kaikuahine manu

O ka ua ahiku o na ua a Maui

O ke kupua eu nana i hoolou

Ke a, ka waha, ka opina o Pimoe

O ka i'a aimoku e halulu ai ka moana

Lilo Pimoe moe i kaina a Maui

Ulu aloha o Mahanauluehu

O kama a Pimoe

Lawena uka ai Maui i na i'a koe ka pewa

I hoohalulu ae Kane ma laua o Kanaloa

O ka ua a hikilele iwa a Maui

Ola Pimoe ma ka pewa

Ola Mahanauluehu ma ka hiu

Lilo Hinakeka ia Peapea

O ke akua peapea o Peapea

O ka ua hoolawa ia a Maui

I waluhia ka maka o Peapeamakawalu

Kikeke ka ua ia Moemoe

Kilika ke kaua a Maui i ka La

I kipuka ahele a Maui

Lilo Makalii i ka La

Lilo ke kau ia Maui

Inu i ka wailena ma ke kuna

O Kane ma laua o Kanaloa

O kaua i ka houpaupa

Puni Hawai'i, puni Maui

Puni Kauai, puni Oahu

I Kahuluu ka ewe i Waikane ka piko

Haule i Hakipuu i Kualoa

O Mauiakamalo

O ka hookalakupua o ka moku

He moku no!

Kapoo i ke ana o Waianuenue,

Lohe ia mai ke kani kuekue,

O ka malo o Kalana, o ia kai hume,

Hanau ka hua moa aue.

Hookano ka la i ke kaahele,

Oo ka moa ula hiwa hulu melemele,

Eia na kukuna loihi welewele

Ua haki ia Puukapele.

Mikimiki na kukuna o ka La,

O Kaehunuiamanua,

Ma Haehae ka ahi kanana,

Me ke kookoo Kauwila.

He keiki mama ka Hina,

Ike ia ka uahi o ka hoomoa,

Umia na alae, lohe ia ka uwa,

A ke ahi i ka hiʻa.

O ke a o ke kupuna, o Manaiakalani,

He makau kupanaha kualiali,

Hookuu i na ale kohu pali,

He keʻu manu ahiahi.

Au i ke kai, hoopaa i ka hoe,

Huki i ke aho a maloeloe,

Lou iho ka lehelehe ao Pimoe,

O Luaehu ke keiki mai koe.

Mikimiki na kukuna o ka La,

O Kaehunuiamanua,

Ma Haehae ka ahi kanana,

Me ke kookoo Kauwila.

He keiki mama ka Hina,

Ike ia ka uahi o ka hoomoa,

Umia na alae, lohe ia ka uwa,

A ke ahi i ka hiʻa.