فولكينو - صباحو مالديف Lyrics

بيوم من الأيام كنت ماشي

كلي إمتعاض تقول ديكتاتور فاشي

نادم أني فقت وقبعت حالي من فراشي

طلعت من البيت لابس شو ما كان عالماشي

من كتر الدخان طقت عندي جوزة الحلق

مالقيت قهوة لعنت البشرية والخلق

يا صباح القلق شعاري الصباحي كوكب بدو حرق

انا ما كفيت الجملة نط بوشي جاري الجلق

وبدأ بتناول البراز

كل ما يحكي بحس طبش راسي الف لوح قزاز

قصة حياتو الزنخة تقول ناقصني اشمئزاز

وعرّ ولادو القرود ومرتو اللي شبه العسكر القوقاز

الله يفرج الله يفرج.. كفيت وعم اتدرج

ضربت عيني ع كلب حد الحاوية عليي عم يتفرج

حسيتو عم يشمت فيي عهيك حياة كريمة

عطرت تمي بأكتر من ٩٩ شتيمة

تابعت بسلام مقتي

كيف ما عم ارمي بصري ماعم شوف غير وجوه معتة

صافن بهالشوارع رح تجيب آخرتي

وكل مالو وجهي عم يشابه جلدة مؤخرتي

حتى الديلر بمنطقتي

وقفتو قلتلو: معك شي ل الله؟ قلي لا بعرض اختي

ماشي ولا يهمك حول مر المسا سهار

منحكي.. ليك انتبه في دورية عالدوار

جاوبتو بضحكة لبكة: زبلطاني فيك وفين

عساس مو فارقة معي ومافي شي عليي مبين

شفتن من بعيد شحطو واحد هويتو برز

قلت بغير طريقي مو مشتاق شك خرز

لفيت عأول مفرق..زمطت ماحدا قشعني

سبيت الدولة ودعيت ما حدا يكون سمعني

شنو بين كل واشي وواشي في شي واشيين تلاتة

بلاد العرب اوطاني... استأنفت حياتي

كل مالا عم تتلاشا تحية صباح الخير

شعب فايق عم بقول الله يمضي اليوم عخير

مو ناقصني بهالبلد زيد من ذنوبي حصة

بس بحس الرب من عشر سنين ساحب ايدو من القصة

مالي بالطويل والطريق الماعاد ساعني

رن موبايلي رفيقي العسكري من زمن الفراعنة

اذا بتسألو (كيفك) بيعتبرا ألعن من مسبة

ما بلحقلو مشفى نفسي ولا الف كادر طبي:

شو في مافي ضيعة؟ لي ماعم تنزل او تحكي

قلي: معلمي ما بقا نفع معو (العسل والوسكي)

ياريت تشفلي حدا بيضاتو كبار معايي يوقف..

قلتلو التغطية سيئة بغير مطرح وقف..

طوط طوط طوط.. واستمرت الخطوات

اشتقت ل الليل بسرعة حسدت عيشة الوطواط

زحمة تقول يوم الحشر وزمامير سيارات

ومو معروف إحم مين ب طيش مين بس عياط

والمنافس كلا خرا تقول بحيرة ملاريا

وشوفيرية مكاري سقف طربا تسمع ساريا

وروايح كلا وخمة ومعد في زحمة عاللحمة

باستثناء شوية جخيخة من الانتيبلوريتاريا

من كتر ما الجو بخوزق بهالوطن صرنا منخل

دراويش بفيضو كرم..وابن العز مستبخل

قبل ما اصفن واسترسل

صادتني ام عبدو الختيارة : الله يرضا عليك احملي هالجرة عالمدخل

يللا مشان تكمل

تكرم عينك خالة

حسيتا جايبة المونديال او ربحانة الرالي

من فرحتا برسالة مازوت خلتني ابتسم

دعتلي الله يجوزك ...فبلحظة احترق الفلم

رجع امتعاضي زلزل بقوة عشرة ع ريختر

وصابتني الرغبة اني بعز هالنهار اسكر

حتى فوتة البار صار بدا قرضين وأكتر

رح لف سيكارة وبزق تخفيضا" لهالتوتر

وقفتني شحادة قالتلي :من مال الله

قلت مال الله انسرق والضبوطة انخفت كلا

قالت طب خليني بصرلك شكلك ابن حلال

تمنيتا تتبخر من وشي ويصيبا اضمحلال

جاييك مال نهر... قلتلا ديوني بحر

قالت طريقك ورد..قلتلا معبا حفر وجور

قالت رح تطمر الفقر وعروسك شعراتا شقر

قلتلا اي طويلة السيرة لك نحنا بزريبة بقر

دوبلتا وجيت لاركد طلعت بوشي مذيعة

شعراتا شقر وخشما متل سنديانة شنيعة

قالتلي: اخي المواطن شو بتحب تحكي عالوضع

"الله يخليلنا الحكومة فول اوبشن مابدو جضع"

مالحقت هبّل تمي وما مرق وقت دقايقَ

صفت سيارة حدي وفنجرت عيني عالسايق

لابس حزام ناسف ودقنو لنص بطنو

كبس زر وبعق: ( الله اكبر !) اجيت فايق

لقيت حالي بتخت وغرفة عالبحر بتطلطل

عم بلهت وعرقان مفنجر دايخ صرت ولول

قلت: وين انااا؟ ردتلي صبية بتسطل

بالمالديف بيبي ما قلتلك قبل النوم لا تتقّل

الحمدلله.. يعني ماني لسا بالبلد مو؟ خييييييي