రైతు Lyrics

వలస పోతున్న ఊరిని ఆపేదెలాగ

గ్రామాలను దేశ పట్టుకొమ్మలు చేసేదెలాగ

ఏడుకొండల మీద ఎంకన్న సామి

యాదగిరిలోన నర్సిమ్మ సామి

కొండగట్టు కాడ అంజన్న సామి

మా ఊరిని కాపాడే పోతురాజుసామి

మము సల్లంగా సూడాలి

మా అండగా మీరుండాలి

దండాలు దండాలు మా సాములోరు

కంచిలో కొలువైన కామాక్షి తల్లి

బెజవాడలో ఉన్న కనకదుర్గమ్మ

చల్లని చూపుల మధుర మీనాక్షమ్మ

మా ఊరి దైవమైన అమ్మోరు తల్లి

మీ దయ మాపైనుండాలి

మా తోడుగా మీరుండాలి

దండాలు దండాలు మా తల్లులారా

వలస పోతున్న ఊరిని ఆపేదెలాగ

గ్రామాలను దేశ పట్టుకొమ్మలు చేసేదెలాగ

మా ఊరు పాడి పంటలకు నెలవు

ఇపుడంతా పెడుతున్నారు దానికి సెలవు

పాడి పంటతో ఏ లాభం రాకపోతే

ఈ తరం చేయనంటోంది వ్యవసాయం

మన తిండికి ఇంకెవరు చేస్తారు సాయం

వలస పోతున్న ఊరిని ఆపేదెలాగ

పండించిన వారికి ఆస్తులు పెరిగేదెలాగ

ఉన్న ఊరిలో ఏ పని చెయ్యమన్నా నామోషీ

పట్నంలో పర్లేదు అయినా పనిమనిషి

ఊరిని వదిలి, పొలాలు అమ్మేసి పోతే

పంట పొలాలు అవుతున్నాయి వెంచర్లు

ఓ తరం భవితకు పడుతున్నాయి పంచర్లు

వలస పోతున్న ఊరిని ఆపేదెలాగ

పంట సాగుకు యువతను మెప్పించేదెలాగ

అన్నదాత శ్రమించి పండించిన

పంటే కదా అసలైన సంపద

అది లేకుంటే బతికేదెలా

మరే ఆస్తి సంపాదించినా

రైతు వంశం నిర్వీర్యమైతే

మరు తరమంతా దానికి దూరమైతే

ఆ పంటలు పండేదెలా

మన కంచం నిండేదెలా

తినగలమా ఏ ఇతర ఆస్తైనా

వలస పోతున్న ఊరిని ఆపేదెలాగ

రైతన్నను రాజుగా చేసేదెలాగ

లేకుంటే ఉండదు మన తిండికి ఠిఖానా