Huminga Lyrics

Pinilit kong tingnan sa positibong pananaw

humihigpit lang 'pag paikot-ikot ang galaw

Regalo sa 'kin ang kalayaan kong sumayaw

Taksil ba 'ko sa buhay kung sakaling umayaw

Sa bawat hakbang na pinakakawalan

Pag-aalalang umaabot ng daan-daan

Nag-aabang ang dalawang paang

Handang magpalamangan para lamang mahagkan

Nasa dulo ng hagdan, mali ang natamasa

Tagal ding naniwala na pag-ibig ang pag-asa

Isang galit na karma ang naghatid ng tasa

Kahit pa magpapalit ng inumin, sa pagbalik, gano'n din ang pait ng lasa

Ilang gabing puyat ang tinagal

Pinaglalaruan ang katotohanan

Nagising na lang no'ng ako na ang sinampal

Ng ating maykapal, ito ang palaging dasal

'Wag mo 'kong kalimutan

Kahit marami pa sa 'ting mag-iba

'Wag mo 'kong kalimutan

Dahil ayokong masanay mag-isa

Kumpleto na ang utang

Kung merong pagkukulang

Kuntento at handa na 'kong maglaho nang tuluyan

Palayain ang sariling gunita

Manatiling huminga

Kailangang sagutin ang katanungan

Wala bang may alam sa 'king tunay na katayuan

Nagpaalam sa magulang, patawad sa kabiguan

Nakalutang na lamang nang buksan na ang pintuan

Natauhan, pagdilat, ako ay nandito pa rin

Palipat-lipat dahil basa ng luha ang sapin

'Yon nga ba ang eksenang nais kong iparating

Malagim na trahedya ang temang naatim

Bahagi ng pagbabakasali ang sumuko

Tulad ng gusaling di mawari kung malapit nang gumuho

Hudyat na kung saan-saan lang nakaturo

Nakakapanlumo ang pagpanaw ng ugat ng puno

Panandalian lamang ang katahimikan

Sa isipan, di magkarinigan, di man

Nila 'ko iwan, ako na lang ang siyang lilisan

Paalam, daigdig, ang nakasulat sa 'king liham

'Wag mo 'kong kalimutan

Kahit marami pa sa 'ting mag-iba

'Wag mo 'kong kalimutan

Dahil ayokong masanay mag-isa

Kumpleto na ang utang

Kung merong pagkukulang

Kuntento at handa na 'kong maglaho nang tuluyan

Palayain ang sariling gunita

Manatiling huminga

Ang hirap pag-usapan ng pagdadalamhati

Mga pinaglumaang naiwan ng may-ari

Pikit-matang lumaban hanggang sa makabawi

Sa nabuong sumpaang tuluyan nang nabali

Gaano katagal na panahon bago masanay

Kung malalaking alon ng alaala ang karamay

Na nakapangalan sa mga maliliit na bagay

Na laging nakaantabay sa bawat sulok ng bahay

Lamig at init, sa panaginip ay may hintayan

Sabay matulog ngunit sa magkaibang himlayan

Kapayapaan patungo sa dulo ng hidwaan

Hindi kahinaan ang pagsuko sa digmaan

'Pag tapos na ang lahat ay gigisingin ng liwanag

Tumingin lang sa malayo, makikita rin ang dagat

Pulutin ang sarili mula sa pagkabasag

Dito na lang manatili habang ika'y kayakap

'Wag mo 'kong kalimutan

Kahit marami pa sa 'ting mag-iba

'Wag mo 'kong kalimutan

Dahil ayokong masanay mag-isa

Kumpleto na ang utang

Kung merong pagkukulang

Kuntento at handa na 'kong maglaho nang tuluyan

Palayain ang sariling gunita

Manatiling huminga