#BoomplayAwards: Diamond Platnumz apokea tuzo sita Boomplay

Diamond Platnumz amefanikiwa kupata tuzo sita Boomplay.

Huu ni muendelezo mzuri wa msanii huyu ambaye kwa sasa ni miongoni mwa wasanii wakubwa barani Afrika akisifika kwa kufanya muziki unaofuatiliwa na mamilioni ya wafuasi wa muziki Afrika na duniani kwa jumla.

Nyimbo ambazo zimempa tuzo ni pamoja na 'Haunisumbui' ambao umepata streams milioni 2, 'Quarantine', 'Inama' ft. Fally Ipupa, 'Jeje', 'Jibebe' ft. Lava Lava & Mbosso (zote zikipata streams milioni 1) na Tuzo ya jumla baada ya nyimbo zake zote kufikisha streams milioni 20.

Kazi za Diamond zinasikilizwa kila pembe ya Afrika na baadhi ya sehemu duniani. Hilo si jambo la kawaida bali imetokana na juhudi kubwa aliyoweka kwenye muziki wake na kujizolewa mamilioni ya mashabiki duniani.

Kwa Tanzania, Diamond amekuwa ni msanii anayefuatiliwa zaidi na wafuasi, mashabiki na wapenda muziki kwa ujumla. Kila wimbo anaoachia umekuwa ukipata mapokezi makubwa kwa wafuatiliaji wa muziki.

Amekuwa akiongoza karibu kwenye kila mtandao wa kusikiliza na kupakua kazi za muziki na mitandao ya kijamii kwa ujumla. Ana wafuasi wengi zaidi kwenye mtandao wa Instagram nchini Tanzania, anaongoza kwa subscribers wengi zaidi YouTube, views wengi zaidi YouTube.

Mwaka jana, Diamond Platnumz alipokea tuzo (Boomplay Plaques) nane baada ya baadhi ya nyimbo na albamu zake kufikisha streams zaidi ya laki tano, huku baadhi zikifikisha zaidi ya milioni moja.

Nyimbo hizo ni 'Jibebe' ft. Lava Lava & Mbosso, 'Inama' ft. Fally Ipupa, 'Baba Lao', 'Kanyaga', 'The One', 'A Boy From Tandale' (albamu), 'My Number 1' (albamu) huku akipata streams za jumla zaidi ya milioni tano.

Mwaka huu tuzo zimepungua kutoka nane mpaka sita. Pengine hii imetokana na ukweli kwamba mwaka huu, tuzo zimeanzia streams milioni 1, wakati mwaka jana zilianzia streams 500k.

Kwa sasa, Diamond anatamba na wimbo wake wa 'Iyo' ambao umetengenezwa kwa mahadhi ya Amapiano.

Unadhani mwakani Diamond atapata tuzo ngapi?

Iyo

#BoomplayAwards #DiamondPlatnumz