#BoomplayAwards: Mbosso abeba Tuzo nane Boomplay

Staa wa muziki kutoka lebo ya WCB Wasafi, Mbwana Yusuph Kilungi 'Mbosso' amefanikiwa kukabidhiwa tuzo (plaques) nane kutoka Boomplay baada ya nyimbo zake kufanya vizuri kwenye app ya Boomplay.

Huu ni mwaka wa pili mfululizo kwa Mbosso kupata tuzo kutoka Boomplay. Mwaka jana Mbosso alipata tuzo tatu kupitia nyimbo zake za 'Nadekezwa', 'Hodari' pamoja na 'Tamu'.

Mwaka huu Mbosso amefanya kufuru ya Tuzo baada ya kupata tuzo nane ikiwa ni ongezeko ya tuzo tano kutoka zile tatu za mwaka jana.

Mwaka huu amepata tuzo kupitia ngoma zake za 'Fall', 'Tamu', 'Nadekezwa', 'Haijakaa Sawa', 'Tamba', 'Maajab', 'Hodari' (nyimbo zote hizi zimepata streams milioni moja kila moja) pamoja na tuzo ya jumla baada ya kufikisha jumla ya streams milioni 20.

Haya ni mafanikio makubwa sana kwa Mbosso, kwani amekuwa miongoni mwa wasanii wachache ambao wamepata tuzo nyingi mwaka huu.

Akizungumza baada ya kukabidhiwa tuzo hiz, Mbosso ametoa shukrani kwa mashabiki wake maana wao ndiyo wamefanya afike alipo sasa na bila wao yeye si chochote.

"Namshukuru Mungu, nawashukuru pia mashabiki wangu kwa kuendelea kuwa karibu na mimi, ku-stream kazi zangu, ku-download na waendelee kusapoti. Zawadi ni za kwetu wote.

Mbosso amesema siri ya mafanikio ya kupata tuzo hizo hana yeye isipokuwa mashabiki wake kwa sababu wao ndio wanaosikiliza kazi zake.

Amewaasa wasanii wenzake ambao bado hawajaamua kutumia fursa za platform kama Boomplay kutangaza kazi zao zaidi basi wafanye hivyo kwani kwa sasa dunia ndiyo imehamia huko.

"Kwa wasanii wenzangu ambao bado wako nyuma, basi ni wakati wao kutumia vizuri platforms hizi kwa sababu zinatusaidia kutangaza muziki wetu lakini pia tunapata hela," amesema Mbosso.

Mbosso amesema ngoma zilizompatia tuzo hizo anaziheshimu sana kwa sababu ndio zilizomtambulisha kwa kiasi kikubwa na kujulikana kwa mashabiki wengi wa muziki.

Kwa sasa Mbosso anatamba na albamu yake ya Definition Of Love, sikiliza hapo chini;

Definition Of Love

#Trending #Music #BoomplayAwards #Mbosso